Isam aithrech (febda fecht)
Author: [unknown]

Isam aithrech (febda fecht)
Prayer for forgiveness
Isam aithrech (febda fecht),
a Choimdiu, do thairimthecht:
dílig dam cach cin rom-thé,
a Chríst, ar do thrócaire.
Ar do thitacht cain i crí,
ar do gein, a mo Nóebrí,
ar do baithis m-búain i fus,
dílig dam cech n-immarbus.
Ar do chrochad co léire,
ó marbaib ar th' eiséirge,
tabair dam dílgud mo thal,
at it Fíadu fírthrócar.

Ar do fresgabáil (sóer sel)
cosin n-Athair for nóebnem, 
feib ro ráidis frinn ría techt
dílaig dam mo thairimthecht.
Ar do thitacht (déoda in gair)
do mess for slóg síl Ádaim,
ar nóe n-grád nime (cen chlith)
dílgiter dam mo chinaid.
Ar buidin na fátha fír,
ar drong molbthach na mairtír,
dílaig dam cach cin rom-gab
ar fairinn na n-úasalathar.
Ar chléir na n-apstal cen chol,
ar slúag na n-úag n-deiscipol,
ar cach nóeb co rath rígda
dílig dam mo mígníma.
Ar cech nóebúaig ós bith bras,
ar bantracht na prímlaíchas,
dílig dam cach cin fo nim
ar Maire n-amra n-Ingin.
Ar muintir talman (torm n-dil)
ar muintir nime nóebgil,
tabair dílgud bas dech
dom chintaib úair 'sam aithrech.