Cen áinius
Author: [unknown]

Cen áinius
Líadain tells of her love for Cuirithir
Luidsium didiu co m-boí i Cill Letrech i tír na n-Déise ina ailithri. Do-luid-si for a iarair-sium ut dixit :
Cen áinius
in gním í do-rigénus:
an ro carus ro cráidius.

Ba mire
nád dernad a airer-som,
mainbed omun Ríg nime.
Níbu amlos
do-som in dál dúthracair,
ascnam sech phéin i Pardos.
Bec m-bríge
ro chráidi frium Cuirithir;
fris-sium ba mór mo míne.
Mé Líadan;
ro carus-sa Cuirithir;
is fírithir ad-fíadar.
Gair bása
i comaitecht Chuirithir;
fris-sium ba maith mo gnás-sa.
Céol caille
fom-chanad la Cuirithir,
la fogur fairge flainne.
Do-ménainn
ní cráidfed frim Cuirithir
do dálaib cach dénainn.
Ní chela:
ba h-ésium mo chrideserc,
cía no carainn cách chena.
Deilm n-dega
ro thethainn mo chride-se;
ro-fess, nicon bía cena.
Is é, didiu, crád do-rat-si fair-sium a lúas ro gab caille.