Géisid cúan
Author: [unknown]

Géisid cúan
Créide's lament for Cáel
Táinic an ingen & do sín re 'tháebh h-í & do-rinne núalghubha & toirrsi mhór. `Cidh dhamsa', ól sí, `an bás d'fagháil do chumhaid mu chéle in tan a-tát na fíadhmhíla folúaimnecha ac fagháil bháis dá chumhaid?' & at-bert Crédhe:
Géisid cúan
ós buinne rúad Rinn Dá Bhárc:
bádud laích Locha Dá Chonn
is ed chaínes tonn re trácht.
(Luinchech) corr
i seiscenn Droma Dá Thrén:
sis ní aincenn a bí ---
coinfíad dá lí for tí a h-én.
Trúag in fhaíd
do-ní smólach i n-Druim Chaín;
ocus ní nemthrúaige in scol
do-ní in lon i Leitir Laíg.
Trúag int séis
do-ní in dam i n-Druim Dá Léis:
marb eilit Droma Sílenn;
géisid dam dílenn dá h-éis.
Ba sáeth lim
bás in laích ro laiged lim:
mac na mná a Daire Dá Dos,
a beith is cros úasa chinn.
Sáeth lim Cáel
do beith i richt mairb rem tháeb,
tonn do thecht tar a tháeb n-gel;
is ed rom-mer mét a áeb.

Trúag in gáir
do-ní tonn tráchta re tráig:
ó ro báid fer ségda sáer
sáeth lim Cáel do dul 'na dáil.
Trúag in fúaimm
do-ní in tonn risin trácht túaid,
ac cenngail im charraic caín,
ac caíned Chaíl ó do-chúaid.
Trúag in tres
do-ní in tonn risin trácht tes;
mise do-dechaid mo ré:
messaite mo gné (fo-fes).
Caínce corr
do-ní tonn trom Tulcha Léis;
mise nochan fuil mo maín
ó rom-maíd in scél rom-géis.
Ó ro báided mac Crimthain
nochan fuil m' inmain dá éis;
is mór tríath ro thuit le a láim;
a cíath i ló gáid nír géis.
& do sín an ingen re táebh Cháeil & fúair bás dá chumhaid; & do h-adlacad íat ar-áen a n-áeinfert ann sin; & as misi féin (ar Caílte) ro tocuibh in lía fil ósa lighi, conidh Feart Cáeil & Créidhe a-derur ris. Ad-ráe búaid & bennacht, a Chaílte, ar Pádraic: s maith in scél do innisis; & caidhi Brócán scríbhnid? Sunna, ar Brócán. Scríbthar lat gach ar chan Caílte. & do scríbadh.